"Mançester Yunayted"in London səfəri fiasko ilə bitdi

İngiltərə Premyer liqasının 36-cı turu “Mançester Yunayted”in böyük hesabla uduzması ilə əlamətdar olub.

“Kristal Pelas”la üz-üzə gələn mankunianlar qapılarından 4 cavabsız top buraxıblar.

Londonun “Selherst Park” arenasında keçirilən matçda ilk qolu 14-cü dəqiqədə Maykl Olise vurub. Fasilə ərəfəsində Jan-Filip Mateta fərqi 2-yə yüksəldib.

2-ci yarıda da hücumlarını davam etdirən “Pelas” 58-ci dəqiqədə üstünlüyünü bir qədər də möhkəmləndirib. Tayrik Mitçellin zərbəsi dəqiq olub: 3-0. Qarşılaşmada son nöqtəni dubl edən Olise qoyub.

Bu qələbədən sonra məğlubiyyətsizlik seriyasını 5 oyuna çatdıran “Kristal Pelas” 43 xalla 14-cü yerdədir. 54 xalı olan “Mançester Yunayted” isə “Çelsi” ilə 7-ci, 8-ci yerləri bölüşdürür.

Qeyd edək ki, “qırmızı şeytanlar”ın son vaxtlar uğursuz nəticələr göstərməsi səbəbindən baş məşqçi Erik ten Haqın istefası gündəmdədir. Klub rəhbərliyinin bir neçə mütəxəssisin namizədliyini nəzərdən keçirdiyi bir vaxtda niderlandlı çalışdırıcı öz istəyi ilə getməyəcəyini açıqlayıb.