"Neftçi" Azərbaycan çempionatında növbəti görüşünü keçirib

“Neftçi” komandası Premyer liqada növbəti matçını keçirib. “Ağ-qaralar” 17-ci turda “Kəpəz”lə üz-üzə gəlib.

“Neftçi Arena”da baş tutan oyunda azarkeşlər 3 qol görüblər. Hesabı 4-cü dəqiqədə meydan sahibləri açıblar. Yeqor Boqomolski Gəncə təmsilçisinin qapısına yol tapıb.

22-ci dəqiqədə fərq 2-yə çatıb. Bu dəfə Filip Ozobiç qonaqları məyus edib. Paytaxt klubu fasiləyə 2-0 hesablı üstünlüklə yollanıb.

2-ci yarıda “Kəpəz” Orxan Əliyevin qolu ilə toplardan birinin əvəzini çıxıb. Lakin qalan vaxtda “Neftçi” qapısını toxunulmaz saxlaya bilib. Qarşılaşma paytaxt klubunun 2-1 hesablı qələbəsi ilə bitib.

Bu nəticədən sonra xallarının sayını 16-ya çatdıran “Neftçi” turnir cədvəlinin 7-ci pilləsində qərarlaşıb. Aktivində 10 xal olan “Kəpəz” isə 9-cu yerdədir.

Qeyd edək ki, “ağ-qaralar” növbəti turda “Turan Tovuz”un qonağı olacaq. Bu oyun dekabrın 21-i saat 16:00-da start götürəcək.