"Neftçi" Azərbaycan derbisində "Qarabağ"la üz-üzə gəlib

“Neftçi” komandası Azərbaycan Premyer liqasında növbəti matçına çıxıb.

“Ağ-qaralar” 15-ci turun mərkəzi matçında “Qarabağ”la üz-üzə gəlib.

“Neftçi Arena”da keçirilən qarşılaşmada hesab 27-ci dəqiqədə açılıb. Leandro Andrade “köhlən atlar”ı irəli çıxarıb. İlk yarı Ağdam klubunun minimal üstünlüyü ilə yekunlaşıb. 53-cü dəqiqədə fərq artıb. Bu dəfə Nəriman Axundzadə meydan sahiblərinin qapısına yol tapıb.

Çox keçmədən qonaqlar 3-cü qolu vurublar. Leandro Andrade dublunu rəsmiləşdirib. Bundan sonra “Neftçi”nin baş məşqçisi Samir Abasov ardıcıl əvəzetmələr etsə də, vəziyyəti dəyişmək mümkün olmayıb. Oyun “Qarabağ”ın 3-0 hesablı qələbəsi ilə yekunlaşıb.

Bu nəticədən sonra “Neftçi”nin aktivində 13 xal var. Paytaxt təmsilçisi hazırda yarış cədvəlində 8-ci yerdədir. 37 xalı olan “Qarabağ” isə çempionata başçılıq edir.

Qeyd edək ki, “Neftçi” növbəti turda səfərdə “Sumqayıt”la üz-üzə gələcək. Dekabrın 8-nə nəzərdə tutulan görüş saat 18:00-da start götürəcək. “Qarabağ” isə dekabrın 7-si “Sabah”ın qonağı olacaq.