"Neftçi" klubu 20-ci turda "Araz-Naxçıvan"la qarşılaşıb

“Neftçi” komandası Premyer liqada növbəti matçını keçirib.

Paytaxt klubu 20-ci turda “Araz-Naxçıvan”ın qonağı olub.

3 qolun qeydə alındığı qarşılaşmada hesabı meydan sahibləri açıblar. 29-cu dəqiqədə Vanderson “ağ-qaralar”ın qapısına yol tapıb.

Fasilədən sonra da hücumlarına ara verməyən Naxçıvan təmsilçisi 64-cü dəqiqədə yenidən “Neftçi” azarkeşlərini məyus edib. Bu dəfə Ramon Maçado hədəfi dəqiq nişan alıb. Az sonra “ağ-qaralar” toplardan birinin əvəzini çıxıb. Lakin Filip Ozobiçin qolu sadəcə təsəlli olub.

Görüş “Araz-Naxçıvan”ın 2-1 hesablı qələbəsi ilə yekunlaşıb. Bu nəticədən sonra əvvəlki kimi 18 xalı olan “Neftçi” 7-ci pillədə qərarlaşıb. 42 xalı olan Naxçıvan klubu isə 2-ci yerdədir. Komanda lider “Qarabağ”dan 8 xal geri qalır.

Qeyd edək ki, “Neftçi” çempionatdakı növbəti matçında “Şamaxı”nı qəbul edəcək. Yanvarın 31-nə nəzərdə tutulan qarşılaşma saat 18:30-da başlayacaq.