"Neftçi" klubu cari mövsümdə ilk qələbəsini qazanıb

Azərbaycan Premyer Liqasının 10-cu turunda daha bir matç baş tutub.

“Neftçi” klubu “Səbail”lə üz-üzə gəlib.

“Neftçi Arena”da keçirilən matçda azarkeşlər 4 qol görüblər. Qarşılaşmada hesabı “ağ-qaralar” açıb. İlk hissəyə əlavə olunan dəqiqələrdə Ramil Şeydayev “dənizçilər”in qapısını dəqiq nişan alıb. Paytaxt təmsilçisi fasiləyə üstün yollanıb. İkinci yarıda meydan sahibləri daha 2 topu “Səbail”in qapısına göndəriblər.

Dembo Darbo dubla imza atıb. Əsas vaxta əlavə olunan dəqiqələrdə qonaqların heyətindən Samir Abdullayev fərqlənsə də, bu sadəcə təsəlli olub. “Neftçi” – “Səbail”: 3-1.

Qeyd edək ki, bu qələbədən sonra aktivində 8 xalı olan “Neftçi” turnir cədvəlinin 7-ci pilləsinə yüksəlib. 8-ci yerdə olan “Səbail”in isə 7 xalı var.

Əlavə edək ki, “Neftçi” növbəti turda “Sabah”ın qonağı olacaq. “Səbail” isə “Sumqayıt”ı qəbul edəcək.