"Neftçi" klubu hazırlıqlarını səylə davam etdirir

“Neftçi” klubu Premyer Liqadakı növbəti matçı üçün hazırlıqlarını davam etdirir.

“Ağ-qaralar” 17-ci tur çərçivəsində “Kəpəz”lə üz-üzə gələcək. Görüş dekabrın 15-i saat 18:30-da “Neftçi Arena”da keçiriləcək.

Paytaxt təmsilçisi 9-cu turda 4-3 hesabı ilə məğlub olduğu “Kəpəz”ə bu dəfə şans verməməyi hədəfləyir.

“Neftçi”nin baş məşqçisi Samir Abasov jurnalistlərə açıqlamasında qarşıdakı 2 oyunda maksimum nəticə əldə etmək istədiyini bildirib:

“Qış fasiləsinə kimi son iki matçımız qalıb. Bunlardan biri evdə, digəri isə səfərdədir. Bu iki oyunda maksimum nəticə əldə etməklə ən azından əhvali-ruhiyyəmizi düzəltmək istəyirik. Ondan sonra qış fasiləsi başlayacaq. Daha sonra isə qış təlim-məşq toplanışına start verəcəyik. Orada yaxşı motivasiya ilə hazırlaşmaq üçün bu iki oyun həddindən artıq vacibdir.

Baxmayaraq ki, nəticələrimiz yaxşı deyil, deyərdim ki, hətta bərbaddır. Ancaq bu, işimizə zərrə qədər də mane olmur. Məğlub olduğumuz hər oyundan belə nəticələr çıxarmağa çalışırıq. Düşdüyümüz vəziyyət elədir ki, çətinliklə də olsa, yavaş-yavaş çıxacağıq, ümidlərimiz böyükdür”.

Xatırladaq ki, “Neftçi” çempionatın son turunda “Sumqayıt”la üz-üzə gəlib. “Ağ-qaralar” “kimyaçılar”a 0-2 hesabı ilə məğlub olub. Bu nəticədən sonra aktivində 13 xal olan paytaxt komandası turnir cədvəlinin 8-ci pilləsində qərarlaşıb.