"Neftçi" PFK "Palms Sports" ilə önəmli sponsorluq müqaviləsi imzaladı

Fevralın 7-si “Neftçi” Peşəkar Futbol Klubu və “International Holding Company”yə məxsus olan “Palms Sports” arasında 5 illik sponsorluq müqaviləsi imzalanıb.

Tədbirdə “Neftçi”nin baş icraçı direktoru Cenk Sümer, klubun İdarə Heyətinin üzvü Emin Əmrullayev, habelə “Palms Ports”un icraçı direktoru Fouad Darviş iştirak ediblər.

2025-2030-cu illəri əhatə edən sponsorluq müqaviləsinə əsasən, “Palms Sports” “Neftçi Arena” və “Neftçi” Futbol Mərkəzinin adlandırma hüquqlarını əldə edib. Yeni adlar tərəfdaşların ortaq qərarı ilə müəyyən edildikdən sonra xəritələr və naviqasiya əlavələri ilə bütün rəsmi platformalarda yenilənəcək.

Bundan başqa, növbəti mövsümün startından 2030-cu ilədək bütün rəsmi və yoldaşlıq oyunlarında “Neftçi”nin A komandasının formalarının üzərində “Palms Sports”un loqolarından biri yerləşdiriləcək. Loqolar oyun formalarından əlavə, məşq ləvazimatlarında və azarkeş məhsullarında da istifadə olunacaq.

Bu sponsorluq müqaviləsi yalnız “Neftçi” PFK-nın maliyyə davamlılığını artırmayacaq, həmçinin klubun beynəlxalq miqyasda daha çox tanınmasına kömək edəcək.

Qeyd edək ki, “International Holding Company” şirkətinin bir müəssisəsi olaraq 2011-ci ildə yaradılan və mərkəzi Birləşmiş Ərəb Əmirliklərinin paytaxtı Əbu-Dabidə yerləşən “Palms Sports” idman menecmenti və təlim şirkətidir.