"Neftçi" Premyer Liqanın 16-cı turunda "Turan Tovuz"la üz-üzə gəlib

Azərbaycan Premyer liqasında 16-cı tura “Neftçi” – “Turan Tovuz” görüşü ilə yekun vurulub.

“Neftçi Arena”da keçirilən qarşılaşmada hesab 5-ci dəqiqədə açılıb. Filip Ozobiç meydan sahiblərini irəli çıxarıb. Az sonra Tovuz kollektivi hesabı bərabərləşdirib. Roderik Miller hədəfi dəqiq nişan alıb: 1-1.

İlk hissə bu hesabla yekunlaşıb. 56-cı dəqiqədə Rəhman Hacıyev 2-ci topu “Turan”ın qapısından keçirib. 3 dəqiqə sonra Oto Con yenidən tarazlığı bərpa etsə də, “ağ-qaralar” qələbə qolunu vurmağı bacarıblar. Aaron Olanare görüşdə son nöqtəni qoyub. “Neftçi” – “Turan Tovuz”: 3-2.

Xallarının sayını 25-ə çatdıran “Neftçi” 3-cü pilləyə yüksəlib. Komanda lider “Qarabağ”dan 10, ikinci yerdə olan “Zirə”dən isə 4 xal geri qalır.

Qeyd edək ki, “Neftçi” növbəti turda “Qarabağ”ın qonağı olacaq. “Turan Tovuz” isə “Zirə”ni qəbul edəcək.