"Neftçi" və "Qəbələ"dən qalibiyyət, "Zirə" ilə "Sumqayıt"dan xal itkisi

“Neftçi” klubu ölkə çempionatında növbəti qələbəsini qazanıb.

“Ağ-qaralar” 5-ci turda “Sumqayıt” kollektivinin qonağı olub. “Kapital Bank Arena”da keçirilən görüşdə hesab 2-ci hissədə açılıb. “Flaqman”ın yeni transferi Dieqo Valdez debüt matçında fərqlənməyi bacarıb: 0-1. Bundan sonra qapılar önündə qol şansları yaransa da, nəticə dəyişməyib. Bu qələbə sayəsində xallarının sayını 8-ə çatdıran “Neftçi” 3-cü pilləyə yüksəlib. Aktivində 7 xalı olan “Sumqayıt” isə 4-cü sıradadır.

Turun digər oyununda “Qəbələ” və “Zirə” kollektivləri üz-üzə gəlib. Qəbələ şəhər stadionunda keçirilən qarşılaşma “qırmızı-qaralar”ın qələbəsi ilə bitib. Matçda yeganə qolu Rauf Hüseynli vurub: 1-0.

Qeyd edək ki, yeni mövsümdə ilk dəfə qalib gələn və aktivinə 3 xal yazdıran “Qəbələ” sonuncu, 4 oyun ard-arda qalibiyyətdən sonra məğlubiyyətlə üzləşən “Zirə” isə 12 xalla 1-ci sıradadır.