"Neftçi"nin dünya reytinqindəki mövqeyi məlumdur

“Neftçi” klubunun dünya reytinqində yeni mövqeyi məlum olub.

“Ağ-qaralar” Beynəlxalq Futbol Tarixi və Statistikaları Federasiyasının hazırladığı siyahıda 403-cü pillədə qərarlaşıb.

Paytaxt təmsilçisi bu göstərici ilə Türkiyə klubları “Antalyaspor” və “Kayserispor”, eləcə də Braziliya nəhəngi “Santos”u qabaqlamağı bacarıb.

Xatırladaq ki, “Neftçi” 2023/2024-cü illər mövsümünün yekununa əsasən, Premyer Liqanı 5-ci yerdə tamamlayıb. 56 xal toplayan Bakı komandası bu nəticə ilə avrokuboklar zonasına düşə bilməyib.

Əlavə edək ki, klubların dünya reytinqində təmsilçilərimizdən "Qarabağ", “Zirə” və “Sabah” da yer alıb. “Köhlən atlar” siyahıda 53-cü, “qartallar” və “bayquşlar” isə müvafiq olaraq 369-cu və 388-ci pillələrdədir.

Reytinqin zirvəsinə gəldikdə isə ilk pillədə ardıcıl 4-cü dəfə İngiltərə çempionu olan “Mançester Siti” qərarlaşıb. Bundesliqanı qazanan “Bayer” 2-ci, 15-ci dəfə Çempionlar Liqasında qalib olan “Real” isə 3-cü yerdədir.