"Qarabağ" 17-ci turda "Sumqayıt"la qarşılaşıb

Azərbaycan Premyer Liqasında 17-ci tur yekunlaşıb.

Son matçda “Qarabağ” və “Sumqayıt” klubları üz-üzə gəliblər. Tofiq Bəhramov adına Respublika Stadionunda baş tutan oyunda qapılara 5 qol vurulub.

Görüşün ilk hissəsində dubl edən Musa Qurbanlı ilə yanaşı, Nəriman Axundzadə fərqlənib. “Köhlən atlar” fasiləyə 3-0 hesablı üstünlüklə yollanıb.

İkinci yarıda meydan sahibləri daha 2 dəfə rəqib qapısına yol tapıblar. Redon Cica və Toral Bayramov “kimyaçılar”ın azarkeşlərini məyus edib.

Beləliklə, qarşılaşma “Qarabağ”ın 5-0 hesablı qələbəsi ilə yekunlaşıb. Bu nəticədən sonra xallarının sayını 41-ə çatdıran Ağdam təmsilçisi turnir cədvəlinə liderlik edir. Aktivində 19 xalı olan “Sumqayıt” isə 6-cı yerdədir.

Qeyd edək ki, “Qarabağ” kollektivi növbəti turda “Şamaxı”nın qonağı olacaq. “Sumqayıt” isə “Kəpəz”lə qarşılaşacaq.