"Qarabağ" klubu çempionatda növbəti dəfə məğlub olub

Azərbaycan çempionatında 11-ci turun gözlənilməz nəticələrindən biri “Araz-Naxçıvan” və “Qarabağ” arasında matçda qeydə alınıb.

Tofiq Bəhramov adına Respublika stadionunda keçirilən görüşdə 3 qol vurulub. İlk hissədə qapılar qarşısında təhlükəli vəziyyətlər yaransa da, hesab açılmayıb. 75-ci dəqiqədə isə Naxçıvan klubunun üzvü Orxan Əliyev 11 metrlik cərimə zərbəsini dəqiq yerinə yetirib. 1-0.

Əsas vaxta artırılan dəqiqələrdə Elvis Maşike “Araz”ın üstünlüyünü 2 topa çatdırıb. “Köhlən atlar”ın gücü ancaq təsəlli qoluna çatıb. Juninyo qarşılaşmada son nöqtəni qoyub. “Araz-Naxçıvan” – “Qarabağ”: 2-1.

Bu qələbə sayəsində xallarının sayını 20-yə çatdıran Naxçıvan kollektivi “Qarabağ”la bərabərləşib. Komandalar 2-ci, 3-cü yerləri bölüşdürürlər. Klublar lider “Zirə”dən 1 xal geri qalır.

Qeyd edək ki, “Qarabağ” növbəti turda “Kəpəz”in, “Araz-Naxçıvan” isə “Sumqayıt”ın qonağı olacaq.