"Qarabağ" klubu dünya reytinqində irəliləyib

09 aprel 2024 236 baxış

“Qarabağ” komandası növbəti dəfə dünya reytinqində irəliləyib.

“Köhlən atlar” Beynəlxalq Futbol Tarixi və Statistikaları Federasiyasının hazırladığı siyahıda 506 kollektiv arasında 48-ci pillədə qərarlaşıb.

Cari mövsümdə vaxtından əvvəl ölkə çempionluğunu qazanan “Qarabağ” 13 pillə irəliləyərək “Napoli”, “Mançester Yunayted” və “Yuventus” kimi nəhəng klubları geridə qoyub.

Ağdam təmsilçisi ilə yanaşı, siyahıda daha 2 komandamız mövqe tutub. Belə ki, “Neftçi” reytinqdə 377-ci, “Sabah” isə 413-cü sıradadır.

Qeyd edək ki, siyahının zirvəsində Çempionlar liqasının son qalibi “Mançester Siti” qərarlaşıb. “Şəhərlilər”in qitənin bir nömrəli klub turnirindəki rəqibi “Real Madrid” isə 2-ci yerdədir.

Bundan başqa, ilk 10-luqda İtaliyanın “İnter”, “Milan” və “Roma”, Almaniyanın “Bayer Leverkuzen”, Braziliyanın “Fluminense”, Misirin “Əl-Əhli”, İspaniyanın “Atletiko” və Niderlandın PSV klubları mövqe tutublar.

#Qarabağ FK