"Real Madrid" 2024-cü ildə növbəti kubokuna yiyələnib

“Real Madrid” FIFA-nın təsis etdiyi qitələrarası kubokda qələbə qazanıb.

Çempionlar liqasının son qalibi olan “kral klubu” finalda Şimali Amerikanın Çempionlar kubokuna yiyələnən Meksikanın “Paçuka” kollektivi ilə qarşılaşıb.

Qətərin Lusail şəhərində keçirilən görüşdə “los blankos” 3-0 hesabı ilə güclü olub. Matçda ilk qolu 37-ci dəqiqədə Kilian Mbappe vurub. Fasiləyə tərəflər İspaniya komandasının minimal üstünlüyü ilə yollanıblar.

53-cü dəqiqədə Rodriqo 2-ci topu rəqibin qapısına göndərib. Son nöqtəni 84-cü dəqiqədə Vinisius Junior qoyub.

“The Best” mükafatının qalibi olan Vini 11 metrlik cərimə zərbəsindən fərqlənib. Beləliklə, inamlı qələbə qazanan “Real” ilk dəfə olaraq təşkil olunan Qitələrarası kubokun sahibi olub.

Madrid təmsilçisi həm də bu il 5-ci yarışda qalibiyyət əldə edib. Ötən mövsümün yekununa əsasən Çempionlar liqası ilə yanaşı, La Liqa və İspaniya superkubokunda qələbəyə sevinən “Real” yeni mövsüm ərəfəsində UEFA superkubokunda qalib olub.