"Real Madrid" Luka Modriçlə bağlı qərarını verdi

“Real Madrid” komandanın liderlərindən Luka Modriçlə bağlı qərarını verib.

“Kral klubu” 38 yaşlı yarımmüdafiəçinin müqaviləsini daha 1 il müddətinə uzadıb.

Son xəbərlərə görə, Luka kollektivdə qalmaq üçün məvacibinin azaldılmasına razılıq verib. Bununla da xorvatiyalı futbolçu bu yay paytaxt təmsilçisinin heyətində 13-cü mövsümünə başlayacaq.

Qeyd edək ki, 2012-ci ildən “los blankos”un şərəfini qoruyan L.Modriç bütün yarışlarda 534 matçda meydana çıxıb. O, bu görüşlərdə 39 qol vurmaqla yanaşı, 86 məhsuldar ötürmə verib.

“Real”la 6 dəfə Çempionlar liqasında qələbə qazanan Luka həm də Madrid kollektivinin tarixində ən titullu futbolçulardan biridir. O, İspaniya nəhəngi ilə dəfələrlə ölkə çempionatı, kuboku və superkuboku, eləcə də klublararası dünya çempionatı və UEFA superkubokunda qalib gəlib.

2018-ci ildə “Qızıl top” mükafatına layiq görülən Luka yaşının çox olmasına baxmayaraq, yığmanın da liderlərindəndir. Xorvatiya millisinin heyətində 174 görüş keçirən veteran oyunçu 24 qolun müəllifidir.