"Real Madrid" və "Barselona" İspaniya superkubokunun qalibini müəyyənləşdirib

Futbol üzrə İspaniya superkubokunun qalibi müəyyənləşib.

Səudiyyə Ərəbistanının paytaxtı Ər-Riyadda keçirilən final matçında əzəli rəqiblər “Real Madrid” və “Barselona” qarşılaşıb.

“Əl-Əvval” stadionunda baş tutan görüşə “kral klubu” yaxşı başlayıb. 7-ci dəqiqədə Vinisius Junior “los blankos”u irəli çıxarıb. 3 dəqiqə sonra braziliyalı hücumçu dubl edib: 2-0.

33-cü dəqiqədə “blauqrana” toplardan birinin əvəzini çıxıb. Robert Levandovski komandasını ümidləndirib. Ancaq “Real” fasiləyədək yenidən fərqi artırıb. 11 metrlik cərimə zərbəsini dəqiq yerinə yetirən Vinisius het-trik edib.

2-ci yarıda da Madrid təmsilçisi daha yaxşı təsir bağışlayıb. 64-cü dəqiqədə Rodriqo “Barsa”nı 4-cü dəfə oyuna mərkəzdən başlamağa məcbur edib. 71-ci dəqiqədə isə kataloniyalılar azlıqda qalıblar. 2-ci sarı vərəqə alan Ronald Arauxo meydandandan uzaqlaşdırılıb.

Qalan vaxtda sərfəli nəticəni qoruyaraq qarşılaşmada 4-1 hesabı ilə qalib gələn “Real” tarixində 13-cü dəfə İspaniya superkubokunun sahibi olub.