"Sabah" çempionatın 30-cu turunda "Qarabağ"la qarşılaşıb

Azərbaycan Premyer liqasında 30-cu tura “Sabah” – “Qarabağ” matçı ilə yekun vurulub.

5 qolun qeydə alındığı görüşdə hesabı qonaqlar açıblar. Leandro Andrade “köhlən atlar”ı irəli çıxarıb. Ancaq çox keçmədən meydan sahibləri tarazlığı bərpa ediblər. Amin Seydiyev hədəfi dəqiq nişan alıb.

38-ci dəqiqədə “bayquşlar” irəli çıxıblar. Cesse Sekidika komandasına üstünlük qazandırıb: 2-1. İlk hissə bu hesabla başa çatıb.

56-cı dəqiqədə Tellur Mütəllimov 3-cü topu “Qarabağ”ın qapısından keçirib. 76-cı dəqiqədə Nəriman Axundzadə fərqi azaltsa da, Ağdam klubu bundan artığını bacara bilməyib. “Sabah” – “Qarabağ”: 3-2.

Bu qələbədən sonra 43 xalı olan “Sabah” 5-ci pillədə qərarlaşıb. Vaxtından əvvəl çempion olan “Qarabağ”ın isə 72 xalı var.

Qeyd edək ki, “Sabah” növbəti turda “Kəpəz”in qonağı olacaq. “Qarabağ” isə “Qəbələ”ni qəbul edəcək.