"Sumqayıt" Konfrans Liqasında cavab matçına çıxıb

01 avqust 2024 219 baxış

Ölkəmizin avrokuboklardakı təmsilçilərindən “Sumqayıt” komandası Konfrans liqasında növbəti oyununu keçirib.

Baş məşqçi Samir Abasovun yetirmələri II təsnifat mərhələsinin cavab matçında Macarıstanın “Fehervar” klubunun qonağı olublar.

“Şoştoi” stadionunda təşkil olunan görüş gərginliyi ilə diqqət çəkib. 90 dəqiqə ərzində hər iki qapı qarşısında təhlükəli vəziyyətlər yaransa da, oyun qolsuz bərabərliklə başa çatıb.

Tərəflər arasında ilk oyun “Fehervar”ın 2-1 hesablı qələbəsi ilə bitdiyi üçün Macarıstan komandası iki matçın yekununda növbəti mərhələyə yüksəlib.

Xatırladaq ki, bu klublar arasında Mehdi Hüseynzadə adına Sumqayıt şəhər stadionunda keçirilən ilk görüşdə təmsilçimiz Səbuhi Abdullazadənin qolu ilə hesabı açsa da, Murad Xaçayevin qırmızı vərəqə alaraq meydandan uzaqlaşdırılmasından sonra vəziyyət dəyişib. Təşəbbüsə yiyələnən “Fehervar” Tobias Kristensen və Ksaba Spandlerin qolları ilə oyundan qalib ayrılıb.

#Sumqayıt FK