"Təhsil" klubu voleybol üzrə I liqada qalib gəlib

Kişi voleybolçular arasında Azərbaycan çempionatının I liqasında mübarizəyə yekun vurulub. Final qarşılaşmasında "Təhsil" və "Ekspress" komandaları üz-üzə gəliblər.

Görüşün ilk seti 25:14 hesabı ilə "Təhsil" kollektivinin xeyirinə bitib. 2-ci hissədə təşəbbüsü əldən verməyən “Təhsil” bu dəfə də güclü olub: 25:17. Sonrakı setdə "Ekspress" daha ciddi müqavimət göstərsə də, bu, nəticə verməyib. 3-cü hissəni 32:30 hesabı ilə qalib tamamlayan "Təhsil" oyunda ümumən 3-0 hesablı qələbə qazanaraq I liqanın qızıl medallarına yiyələnib.

Qeyd edək ki, final qarşılaşmasından sonra təşkil olunan mükafatlandırma mərasimində həm kişi, həm də qadın voleybolçular arasında I liqanın qalibi olan komandalara mükafatlar təqdim olunub. Tədbirdə çıxış edən Voleybol Federasiyasının prezidenti Şahin Bağırov yarışın yüksək səviyyədə təşkil olunduğunu, görüşün gərgin və maraqlı alındığını bildirib. Qalibləri təbrik edən qurum rəhbəri onlara gələcək turnirlərdə uğurlar arzulayıb.