“Real Madrid” ulduz futbolçusunu itirməyə yaxındır

“Mançester Yunayted” “Real Madrid”in braziliyalı ulduzu Vinisius Juniorun transferi üçün hərəkətə keçib.

Xarici medianın məlumatına görə, “qırmızı şeytanlar” 24 yaşlı forvarda ümumi dəyəri 200 milyon avro olan 5 illik müqavilə təklif edib. Mankunianlar futbolçunun razılığını alacaqları təqdirdə keçid üçün Madrid təmsilçisinə 230 milyon avro ödəməyə hazırdır. Lakin “los blankos”la müqaviləsi 2027-ci ilə qədər olan Vinisius komandadan ayrılmaq fikrində deyil.

Qeyd edək ki, Vinisius Junior 2018-ci ildə 45 milyon avroya Braziliyanın “Flamenqo” klubundan “Real Madrid”ə transfer olunub. Bu müddət ərzində 264 oyuna çıxan futbolçu 83 qol və 75 məhsuldar ötürmə müəllifi olub. Kollektivlə 2 dəfə Çempionlar liqasını qazanan Junior İspaniya çempionatı, kuboku və superkuboku, eləcə də UEFA superkuboku və klublararası dünya çempionatında qalib gəlib. “Transfermarkt” portalına əsasən dəyəri 180 milyon avro olan oyunçu Braziliya millisinin də əsas üzvüdür. 33 matçda “sambaçılar”ın formasını geyinən Vini 5 qolun müəllifidir.