Rusiya millisinin əfsanəsi "Sabah"da işləməyə yaxındır
Rusiya millisi tarixinin ən sərrast futbolçusu, bir vaxtların məşhur hücumçularından Aleksandr Kerjakov Murad Musayevin istefasından sonra baş məşqçisiz qalan “Sabah”la müqavilə imzalamağa yaxındır.
Bu barədə Rusiyanın “Sport-Ekspress” nəşri məlumat yayıb.
Bildirilib ki, 41 yaşlı mütəxəssis hazırda Azərbaycan klubu ilə danışıqlar aparır. Bundan başqa, hələlik adı çəkilməyən Özbəkistan kollektivi də A.Kerjakovun dəvətində maraqlıdır.
Qeyd edək ki, futbolçu karyerasını 2017-ci ildə başa vuran Aleksandr Kerjakov dəfələrlə Rusiya çempionu olmaqla yanaşı, 2007-ci ildə “Sevilya” ilə UEFA Kuboku, İspaniya Kuboku və Super Kubokunda qələbə qazanıb.
Baş məşqçi kimi 2020-ci ildə ölkəsinin “Tom” komandasında debüt edən mütəxəssis sonradan “Nijni Novqorod”, habelə Kiprin “Karmiotissa” və Serbiyanın “Spartak Subotitsa” kollektivində işləsə də, uğur qazana bilməyib.