“Sabah” klubu “İnter”in sabiq hücumçusunu transfer edib

“Sabah” komandası yeni transferini açıqlayıb. “Bayquşlar” əlcəzairli hücumçu İshak Belfodili heyətinə qatıb.

Klubdan verilən məlumata görə, 31 yaşlı forvardla 2 illik müqavilə imzalanıb. Lakin tərəflər arasında razılığa əsasən, sözləşmənin müddətini daha 1 illik uzatmaq mümkündür.

Təcrübəli oyunçu ötən mövsüm ölkə çempionatında gümüş medalları qazanan kollektivdə 14 nömrəli formanı geyinəcək.

Qeyd edək ki, Fransanın “Lion” komandasının yetirməsi olan Belfodil müxtəlif vaxtlarda İtaliyanın “İnter”, “Bolonya”, “Parma” və “Livorno”, eləcə də Almaniyanın “Verder”, “Hoffenhaym” və “Herta” klublarında top qovub. Bundan başqa, o, müxtəlif vaxtlarda Belçikanın “Standard”, Birləşmiş Ərəb Əmirliklərinin “Bani Yas”, habelə Qətərin “Əl-Qarafa” komandalarında çıxış edib. “Transfermarkt” portalına əsasən, dəyəri 1 milyon 700 min avro olan hücumçu ümumən karyerası ərzində 311 görüşdə 76 qolla yadda qalıb. 2013-2022-ci illərdə Əlcəzair millisinə də çağırılan futbolçu 19 matçda 2 qolun müəllifidir.