Sabiq futbolçu A Seriyasındakı çempionluq mübarizəsinə və “Milan”ın vəziyyətinə münasibət bildirib

"Milan"ın keçmiş qolkiperi Nelson Dida cari mövsüm A Seriyasındakı çempionluq mübarizəsinə və "qırmızı-qaralar"ın hədəflərindən uzaq düşməsinə münasibət bildirib.

Onun dediklərini "Milan News" belə çatdırıb:

"Əla çempionatdır. Belə sonluq bütün futbolsevərlər üçün möhtəşəmdir. "Napoli" və "İnter" iki böyük komandadır. Nə olacağını birlikdə görəcəyik. Proqnoz verməyə dəyməz, çünki hər ikisi güclüdür. Hər şey son turda bəlli olacaq. "Milan"ın uğursuzluğu? Heç kim meydana pis nəticə üçün çıxmır. "Milan"a yazığım gəlir. Həmişə onlara yaxın olmuşam və ümid edirəm ki, növbəti mövsüm yenidən çempionluq uğrunda mübarizə aparacaqlar".

Qeyd edək ki, A Seriyasındakı mübarizənin yekunlaşmasına 1 tur qalmış "Napoli" 79 xalla 1-ci, 78 xala malik "İnter" 2-ci pillədədir. 60 xal toplayan "Milan" isə 9-cu pillədə mövqe tutub.