Səudiyyə Ərəbistanından olan investorlar İtaliya klubunu alır

Səudiyyə Ərəbistanından olan investorlar daha bir məşhur futbol klubunu almaq niyyətindədir.

Xarici mediada yayılan məlumata görə, bu ölkədən olan iş adamları tezliklə “Roma” komandasının yeni sahibləri ola bilər. Bilidirilib ki, məsələ ilə bağlı Səudiyyə Ərəbistanının paytaxtı Ər-Riyadda görüş də baş tutub.

Son xəbərlərə görə, investorlar “Roma” klubunun səhmlərinin 100 faizini əldə etməyi planlaşdırır.

Qeyd edək ki, hazırda “Roma” kollektivinin prezidenti amerikalı iş adamı Tomas Den Fridkindir. Onun adını daşıyan şirkət 2020-ci ildən klubun sahibidir.

Xatırladaq ki, 1927-ci ildə təsis edilən “Roma” komandası A Seriyasının 3 qat qalibidir. Müxtəlif vaxtlarda 9 dəfə İtaliya Kubokuna yiyələnən “canavarlar” 2022-ci ildə Joze Mourinyonun rəhbərliyi ilə Konfrans Liqasında qalib gəliblər.