SOCAR və “Qalatasaray” klubu arasında 3 illik sözləşmə imzalandı

Azərbaycan Respublikası Dövlət Neft Şirkəti və “Qalatasaray” klubu arasında sponsorluq müqaviləsi imzalanıb.

“Ali Sami Yen” İdman Kompleksində baş tutan tədbirdə “SOCAR Türkiyə” şirkətinin baş icraçı direktoru vəzifəsini müvəqqəti icra edən Elçin İbadov Türkiyədə idmana verdikləri dəstəyə yeni bir halqa əlavə etdiklərini bildirib. O, “Qalatasaray”ın Çempionlar liqasında yoluna uğurla davam edəcəyinə ümidvar olduğunu bildirib.

Türkiyə nəhənginin prezidenti Dursun Özbek isə SOCAR-la əməkdaşlıqdan məmnun olduqlarını deyərək, böyük hədəflərə doğru yolda SOCAR-ın dəstəyinin önəmli olduğunu vurğulayıb.

Qeyd edək ki, tərəflər arasında imzalanan 3 illik müqavilənin ümumi dəyəri 15 milyon avrodur. Razılaşmaya əsasən, “Qalatasaray” 2023/2024 mövsümündə UEFA-nın bütün rəsmi klub turnirlərində sinəsində SOCAR yazısı olan formada çıxış edəcək.

Bundan başqa, SOCAR mediada “Qalatasaray Futbol Komandasının Enerji Sponsoru” ifadəsindən istifadə etmək hüququna da malikdir.