Stolüstü tennisçilərimiz Qazaxıstandakı yarışda uğurla çıxış edib

Stolüstü tennisçilərimiz Qazaxıstanda təşkil olunan beynəlxalq yarışda uğurlu nəticəyə imza atıblar. Onlar Çimkənd şəhərində baş tutan "Shimkent cup" turnirində 2 medal qazanıblar.

Qızların qoşa mübarizəsində çıxış edən Mərziyyə Nurmətova və Aylin Əsgərova bütün rəqiblərinə qalib gələrək fəxri kürsünün ən yüksək pilləsinə qalxıblar.

Bundan başqa, Mərziyyə Nurmətovanın fərdi turnirdə çıxışı da uğurlu alınıb. Sumqayıt stolüstü tennis məktəbinin yetirməsi olan Mərziyyə Çimkənddəki yarışın fərdi növündə bürünc mükafata yiyələnib. Bununla da böyük məşqçi Fərhad İsmayılov və məşqçi Ramil Cəfərovun rəhbərliyi ilə turnirə qatılan seçməmiz "Shimkent cup" turnirini 1 qızıl və 1 bürünc mükafatla başa vurub.