“Sumqayıt” bu gün “Fehervar”ın qonağı olacaq

Ölkəmizin UEFA Konfrans liqasındakı təmsilçilərindən “Sumqayıt” bu gün yarışda növbəti görüşünü keçirəcək.

Komandamız II təsnifat mərhələsinin cavab matçında Macarıstanın “Fehervar” kollektivinin qonağı olacaq.

Sekeşhervar şəhərinin “Şoştoi” stadionunda təşkil olunacaq oyun Bakı vaxtı ilə saat 21-də start götürəcək. Qarşılaşmanın baş hakimi isə isveçli Kristofer Karlsson olacaq.

Xatırladaq ki, bu klublar arasında Mehdi Hüseynzadə adına Sumqayıt şəhər stadionunda keçirilən ilk görüşdə təmsilçimiz 1-2 hesabı ilə uduzub. Komandamız Səbuhi Abdullazadənin qolu ilə hesabı açsa da, Murad Xaçayevin qırmızı vərəqə alaraq meydandan uzaqlaşdırılmasından sonra vəziyyət dəyişib. Təşəbbüsə yiyələnən “Fehervar” Tobias Kristensen və Ksaba Spandlerin qolları ilə oyundan qalib ayrılıb.