Tanınmış idman veteranı Əhməddin Rəcəblinin 80 illik yubiley mərasimi keçirilib

Azərbaycanın tanınmış idman veteranı Əhməddin Rəcəblinin 80 illik yubiley mərasimi keçirilib.

Azərbaycan İdman Akademiyasının akt zalında təşkil olunan tədbirdə gənclər və idman naziri Fərid Qayıbov Əhməddin Rəcəblinin uzun illər Azərbaycan idmanının inkişafı naminə çalışdığını, gənc idmançıların yetişməsində mühüm rol oynadığını bildirib.

Nazir idman veteranına uzun və mənalı ömür, möhkəm cansağlığı arzu edib.

Milli Olimpiya Komitəsinin vitse-prezidenti Çingiz Hüseynzadə isə qeyd edib ki, Əhməddin Rəcəbli ölkədə sağlam həyat tərzinin təbliğinə töhfə verən şəxslərdən biridir.

Sonra Əməkdar məşqçinin zəngin həyat yolundan, idmana verdiyi dəyərli töhfələrdən və gənc nəslin yetişməsindəki xidmətlərindən bəhs edən videoçarx nümayiş olunub.

Sonda Əhməddin Rəcəbli onu sevənləri bu önəmli günündə bir arada gördüyü üçün xoşbəxt olduğunu vurğulayıb.