Top klublar Joze Mourinyonu dəvət etmək istəyir

“Roma” klubunun baş məşqçisi Joze Mourinyo “Çelsi” və PSJ-nin maraq dairəsindədir.

Adıçəkilən klubların rəhbərləri 60 yaşlı mütəxəssisi komandanın sükanı arxasına dəvət etməyi planlaşdırırlar. Son xəbərlərə görə, London təmsilçisinin nümayəndələri Joze ilə əlaqə saxlasalar da, portuqaliyalı çalışdırıcı onların təklifini rədd edib.

PSJ rəhbərliyi isə hazırkı baş məşqçi Kristof Qaltye ilə bağlı yekun qərarını mövsüm başa çatdıqdan sonra verəcək. K.Qaltyenin göndəriləcəyi təqdirdə onun yerinə əsas namizəd kimi məhz J.Mourinyo göstərilir.

Qeyd edək ki, 2021-ci ildən “Roma”da işləyən J.Mourinyo daha əvvəl 2004-2007 və 2013-2015-ci illər ərzində “Çelsi”yə rəhbərlik edib. Onun dövründə komanda 3 dəfə İngiltərə çempionu olmaqla yanaşı, FA kuboku və Liqa kubokunun sahibi olub. Karyerası ərzində “Portu”, “İnter”, “Real Madrid” və “Mançester Yunayted” kimi kollektivlərdə də baş məşqçilik edən Joze bu komandalarla da müxtəlif mükafatlar qazanıb.