İdman
Pleyeri seçin:
U-17 dünya çempionatında güləşçilərimizdən uğurlu nəticə
Azərbaycanın 17 yaşadək güləşçiləri dünya çempionatını uğurla başa vurublar.
İdmançılarımız İordaniyada təşkil olunan turniri 2-si qızıl, 1-i gümüş və 7-si bürünc olmaqla ümumən 10 medalla tamamlayıblar.
Yunan-Roma güləşçilərimizdən 51 kq-da çıxış edən Turan Daşdəmirov finalda qırğızıstanlı Kutman Kalbayevi, 60 kq-da mübarizə aparan Ayxan Cavadov isə gürcüstanlı Vaxtanq Loluanı məğlub edərək fəxri kürsünün ən yüksək pilləsinə qalxıb.
Digər pəhləvanımız 60 kq çəki dərəcəsində yer alan Hüseyn İsmayılov isə yalnız həlledici görüşdə uduzaraq gümüş mükafatla kifayətlənib.
Bundan başqa, təmsilçilərimizdən Hüseyn Hüseynov, Əmrah Əmrahov, Rəvan Həsənzadə və Muxamad Qantemirov ölkəmizə bürünc medallar qazandırıblar. Qızların turnirində isə Zəhra Kərimzadə, Nəzrin Əhmədli və Günay Qurbanova 3-cü yerin sahibi olublar.
Qeyd edək ki, İordaniyanın paytaxtı Ammanda keçirilən yarış avqustun 19-dan 25-dək davam edib.
Kopyalandı
Seçilmişlər
