UEFA Çempionlar Liqasında 2-ci turun oyunları keçirilir

UEFA Çempionlar liqasında qələbələrin sayına görə rekordçu olan “Real Madrid” 2-ci turda “Napoli”yə qalib gəlib.

Neapolda keçirilən qarşılaşmada meydan sahibləri Estiqorun qolu ilə hesabı açsalar da, “kral klubu” fasiləyədək Vinisius və Bellingemin topları ilə irəli çıxıb: 2-1.

2-ci yarıda isə tərəflər hərəyə 1 dəfə fərqlənib. Zelinski penaltidən tarazlığı bərpa etsə də, 78-ci dəqiqədə Valverdenin qüvvətli zərbəsindən sonra Meretə dəyərək qapıya daxil olan top yekun hesabı müəyyənləşdirib. “Napoli” – “Real Madrid”: 2-3.

Gecənin gözlənilməz nəticələrindən biri Fransada “Lans” və “Arsenal” arasında mübarizədə qeydə alınıb. Matçın favoriti olan “topçular” 14-cü dəqiqədə Jezuşun qolu ilə önə keçsələr də, əzmkarlıq göstərən “Lans” Tomasson və Vainin qolları ilə 2-1 hesablı qələbəyə sevinib. Xallarının sayını 4-ə çatdıran Fransa klubu “Arsenal”ı qabaqlayaraq B qrupunda liderliyə yüksəlib.

Ötən mövsüm yarışda finaladək irəliləyən “İnter” də turu qalibiyyətlə tamamlayıb. “Cuzeppe Meatsa” arenasında “Benfika”nı qəbul edən “neradzurri” Türamın qolu sayəsində 3 xalı aktivinə yazıb. İlk turda “Real Sosyedad”la sülhə razılaşan “İnter” bu kollektivlə birlikdə D qrupunda 1-ci, 2-ci yerləri bölüşdürür. 2 oyundan sonra xalsız qalan “Benfika” isə sonuncu yerdədir.