WBC çempionu Tayson Fyuri Frensis Nqannu ilə qarşılaşıb

29 oktyabr 2023 274 baxış

Səudiyyə Ərəbistanının paytaxtı Ər-Riyad şəhərində peşəkar boks gecəsi keçirilib.

Əsas döyüş WBC versiyası üzrə çempion, britaniyalı məşhur boksçu Tayson Fyuri və sabiq UFC çempionu kamerunlu Frensis Nqannu arasında olub.

WBC-nin xüsusi kəməri uğrunda baş tutan görüş T.Fyuri üçün çətin alınıb. Peşəkar boksda debüt edən F.Nqannu 3-cü raundda Taysonu nokdauna göndərib.

Frensis qarşılaşma ərzində də inamlı təsir bağışlasa da, yekunda qələbəni T.Fyuri bayram edib. Belə ki, hakimlərdən 2-si qalibiyyəti Taysona, 1-i isə kamerun boksçusuna verib. Beləliklə, karyerasında 35-ci döyüşə qatılan Tayson Fyuri 34-cü qələbəsini qazanıb.

Qeyd edək ki, F.Nqannu ilə görüşdən sonra T.Fyuri və IBO versiyası üzrə dünya çempionu, ukraynalı Aleksandr Usik arasında baxış dueli olub. Daha əvvəl bu idmançılar arasında görüşün keçirilməsi nəzərdə tutulsa da, müxtəlif səbəblərdən döyüşün təşkili təxirə salınıb.

#Səudiyyə Ərəbistanı