XXI əsrin ən yaxşı baş məşqçisinin adına aydınlıq gəlib

Dünyaca məşhur “Goal” nəşri XXI əsrin ən yaxşı baş məşqçilərinin adlarını açıqlayıb.

25 mütəxəssisin yer aldığı siyahıya “Mançester Siti”nin çalışdırıcısı Xosep Quardiola başçılıq edir. 2-ci pillədə Çempionlar liqasını 5 dəfə qazanan “Real”ın baş məşqçisi Karlo Ançelotti qərarlaşıb.

İlk üçlüyü uzun illər “Mançester Yunayted”ə rəhbərlik edən əfsanəvi Aleks Ferqyuson qapayır. Siyahının ilk 10-da Joze Mourinyo, Yurgen Klopp, Zinəddin Zidan, Dieqo Simeone, Visende del Boske, Luis Enrike və Antonio Konte kimi məşhur mütəxəssislərə də yer verilib.

Qeyd edək ki, “Goal” nəşrinin XXI əsrin ən yaxşı baş məşqçisi elan etdiyi X.Quardiola son vaxtlar kəskin tənqidlərlə üzləşib. Onun rəhbərlik etdiyi “Siti” bütün yarışlarda 7 oyundur qələbə qazanmır. “Şəhərlilər” bu müddət ərzində 6 dəfə uduzub, 1 dəfə isə heç-heçə ediblər. Eyni sözləri siyahının 2-ci pilləsində olan Karlo Ançelotti haqqında da demək olar. Kilian Mbappenin keçidindən sonra oyun üslubunda ciddi problemlərlə üzləşən “Real Madrid” mövsüm ərzində qeyri-sabit nəticələrlə diqqət çəkir.