Yarım ağır çəkidə mütləq dünya çempionu məlum oldu

Səudiyyə Ərəbistanının paytaxtı Ər-Riyadda yarım ağır çəkidə boks üzrə mütləq dünya çempionu müəyyənləşib.

Həlledici görüşdə rusiyalı dəri əlcək ustaları Artur Beterbiyev və Dmitri Bivol üz-üzə gəlib.

Döyüşün əvvəli kəşfiyyat xarakterli olub. Burada Dmitri Bivolun cüzi üstünlüyü müşahidə olunub. Lakin döyüşün ortalarına yaxın A.Beterbiyev təşəbbüsü əlinə almağı bacarıb. Çempionluq raundları gərgin keçib və mübarizə 12 raund davam edib. Bundan sonra hakimlər A.Beterbiyevin xeyrinə qərar veriblər.

Beləliklə, rəqibinə qalib gələn Artur Beterbiyev Rusiyadan olan ilk mütləq dünya çempionu olub.

Dmitri Bivol titul uğrunda döyüşdə həmyerlisi Artur Beterbiyevə uduzduqdan sonra revanş haqda danışıb.

“Əlbəttə, belə bir şans olarsa, mən revanş oyunu istəyirəm. Şübhəsiz, çempion olmaq istəyirəm”, – deyə D.Bivol döyüşdən sonra fikirlərini bölüşüb. Qalib gələn A.Beterbiyev də final döyüşü barədə danışıb.

“Yaxşı bir zərbə vurmaq istədim, amma bacarmadım. Bircə dənə imza zərbəsi vurmaq mümkün olmadı. Bu gün daha şanslı idim. Mən çox sadə boksçuyam. Mənim kimi minlərlə var”, – deyən A.Beterbiyev Dmitri Bivolun revanş məsələsinə də toxunub.

“Əgər qisas almaq istəyirsə, deməli, biz hazırıq. Hər şey üçün təşəkkür edirəm, Səudiyyə Ərəbistanı”, – deyə A.Beterbiyev döyüşdən sonra əlavə edib.