Yay ərzində transferlərə ən çox pul xərcləyən klubların siyahısı

Dünyaca məşhur “transfermarkt” portalı yay keçid dövrü ərzində ən çox pul xərcləyən klubların siyahısını tərtib edib.

Sıralamaya son vaxtlar bahalı transferlərlə diqqət çəkən “Çelsi” başçılıq edir. İngiltərə təmsilçisi ötən yay ərzində 464,1 milyon avro xərcləyib.

“Zadəganlar”ın yeni futbolçuları arasında ekvadorlu Moyses Kaysedonun keçidi xüsusilə diqqət çəkir. London komandası 21 yaşlı dayaq yarımmüdafiəçisinə görə “Brayton”a 116 milyon avro ödəyib. Ən çox pul xərcləyən komandaların siyahısında 2-ci pillədə 353,1 milyon avro ilə “Əl-Hilal” qərarlaşıb. 90 milyon avroya Neymarı heyətinə qatan Səudiyyə Ərəbistanı klubu Malkom, Ruben Neveş, Aleksandar Mitroviç, Sergey Milinkoviç-Saviç kimi tanınmış futbolçularla da müqavilə bağlayıb.

Geridə qalan yay ərzində transferlər üçün ən çox ödəniş edən 3-cü klub isə “Pari Sen-Jermen”dir. Keçid dövrünün son saatlarında 95 milyon avroya Randal Kolo Muanini transfer edən Fransa nəhəngi Usman Dembele, Lüka Ernandes kimi oyunçuları da heyətinə cəlb edib.

Qeyd edək ki, ötən 3 ay ərzində ən çox pul xərcləyən klubların ilk 10-luğunda İngiltərənin “Tottenhem”, “Mançester Siti”, “Arsenal”, “Mançester Yunayted” və “Liverpul”, eləcə də Səudiyyə Ərəbistanının “Əl-Əhli” və “Əl-Nəsr” kollektivləri də var.