“Zirə” klubu Konfrans Liqasında cavab matçına çıxıb

“Zirə” komandası UEFA Konfrans liqasında növbəti mərhələyə yüksəlib.

Təmsilçimiz bu uğura iki oyunun yekununda Slovakiyanın “DAK-1904” klubunu üstələməklə nail olub.

Tərəflər arasında ilk qarşılaşmada 4-0 hesablı qələbə qazanan “qartallar” səfərdə keçirilən cavab matçında da qalib gəliblər.

“MOL Arena”da təşkil olunan görüşdə hesabı 25-ci dəqiqədə “Zirə”nin üzvü Rafael Utziq açıb. Lakin meydan sahibləri fasiləyədək tarazlığı bərpa ediblər. Alehandro Mendes fərqlənib. İlk yarı 1-1 hesabı ilə bitib.

56-cı dəqiqədə Romarik Yapinin birbaşa qırmızı vərəqə almasından sonra “DAK-1904” azlıqda qalıb. 11 metrlik cərimə zərbəsini dəqiq yerinə yetirən Qismət Alıyev isə komandamızı yenidən irəli çıxarıb.

Qalan vaxtda başqa qol olmayıb və matçda 2-1, ümumən iki görüşün yekununda isə 6-1 hesabı ilə güclü olan “Zirə” növbəti raunda adlayıb.

Təmsilçimiz III təsnifat mərhələsində Xorvatiyanın “Osiyek” klubu ilə üz-üzə gələcək. Tərəflərin ilk qarşılaşması avqustun 8-i Xorvatiyada keçiriləcək. Cavab oyunu isə avqustun 15-i Bakıda təşkil olunacaq.