Bağlanan "Günay Bank"dakı əmanətlərin sonu necə olacaq?

Mərkəzi Bankın İdarə Heyətinin qərarı ilə “Günay Bank”ın lisenziyası mayın 17-dən ləğv edilib.

Qərar məcmu kapitalının miqdarının banklar üçün müəyyən edilən minimum miqdarından az olduğuna, məcmu kapitalının adekvatlıq əmsalının 3 faizdən az olmasına, habelə cari fəaliyyətini etibarlı və prudensial qaydada həyata keçirmədiyinə görə verilib. Bankın müflisləşmə yolu ilə ləğv edilməsi barədə məhkəməyə müraciət olunub.

Mərkəzi Bankdan verilən məlumata görə, qurumun qərarı ilə “Günay Bank”a müvəqqəti inzibatçı təyin olunub, bankın idarә olunması üzrә bütün sәlahiyyәtlәr, o cümlәdәn bank sәhmdarlarının ümumi yığıncağının sәlahiyyәtlәri müvәqqәti inzibatçıya keçib.

“Günay Bank”ın ölkənin bank sisteminin aktivlərində xüsusi çəkisi 0.6%, kredit portfelində 1%, sektorun öhdəliklərində isə cəmi 0.5% təşkil edir. Mərkəzi Bankın məlumatına görə, “Günay Bank”ın bank lisenziyasının ləğvi bank sektorunun maliyyə dayanıqlığı və maliyyə sabitliyinə heç bir təhdid yaratmır.

Bildirilir ki, “Günay Bank” Əmanətlərin Sığortalanması Fonduna üzvdür və əhalinin bu bankda sığortalanmış əmanətləri üzrə kompensasiyalar fond tərəfindən qanunvericiliyə uyğun qaydada ödəniləcək. “Günay Bank”ın digər öhdəlikləri məhkəmə tərəfindən təyin olunacaq ləğvedici tərəfindən qanunvericiliyə müvafiq qaydada tənzimlənəcək. Bankın fonda təqdim etdiyi hesabatlara əsasən 2023-cü ilin I rübünün sonuna Bank üzrə sığortalanan əmanətlər 38.5 mln. manat təşkil edir.

Qeyd edək ki, bankın əmanətçilərinin say etibarı ilə 99.9%-nin əmanətləri kompensasiya olunacaq.