Baş nazirin müavini Azərbaycan iqtisadiyyatının dayanıqlılığından danışdı

Beynəlxalq investisiya forumu çox yüksək səviyyəli hökumət rəsmilərini, biznes rəhbərlərini, maliyyə rəhbərlərini, beynəlxalq təşkilatların nümayəndələrini bir araya gətirib.

Bunu Baş nazirin müavini Samir Şərifov Bakıda keçirilən I Azərbaycan Beynəlxalq İnvestisiya Forumunda (AIIF 2025) deyib.

Onun sözlərinə görə, bu beynəlxalq tədbirdə beyin mərkəzləri, akademik müəssisələr, müxtəlif ölkələr təmsil olunur:

“Yaxın Şərqdən, Asiyadan, Avropadan nümayəndələr var. Bu bizə fikir mübadiləsi aparmaq üçün yaxşı imkanlar təqdim edir. Hazırda misli görünməmiş çağırışlarla, münaqişələrlə, qarşıdurmalarla müşayiət olunan cari siyasi və iqtisadi landşaftı nəzərə alsaq, zaman dəyişir, qiymətlər dəyişir. Bu, eyni zamanda irihəcmli dövlət borcları və digər çağırışlarla müşayiət olunur. Bəzi qabaqcıl iqtisadiyyatlar bundan təsirlənir. Bu fonda Azərbaycan etibarlı, güvənli, əlaqələndirici bir dövlətə çevrilib”.

Baş nazirin müavini əlavə edib ki, Azərbaycan Şimal, Cənub, Qərb, Şərqin qovşağında yerləşir:

“Azərbaycan cənab Prezidentin vizyonu sayəsində zəruri infrastruktur yarada bilib ki, ölkəyə investisiyalar yatırılsın. Siyasi stabillik və proqnozlaşdırıla bilmə, güclü maliyyə təməlləri, makroiqtisadi stabillik və yaxşı biznes mühitinin olması investisiyalar üçün çox vacibdir.

Reytinqlərə nəzər salsaq görərik ki, Azərbaycan son illərdə buna hazırdır. Dünya bankı, digər qabaqcıl beynəlxalq kredit agentlikləri tərəfindən aparılan sorğuların nəticələrinə görə, Azərbaycanın reytinqi daha da yüksəlib. Son illərdə biz kredit reytinqlərimizi investisiya dərəcəsinə çatdıra bilmişik”.