Biznes mühiti ilə bağlı hansı işlər görülüb? - Baş nazirin müavinindən açıqlama

Heç bir inkişaf investisiyasız mümkün deyil.

Bunu jurnalistlərə açıqlamasında Baş nazirin müavini Samir Şərifov bildirib.

“İnvestisiyalar həm dövlət büdcəsindən maliyyələşən və həm də özəl olmalıdır. Ona görə də bizim hədəfimiz indi daha çox özəl investisiyaları cəlb etməkdir. İnvestisiya üçün genişmiqyaslı islahatlar və zəruri infrastrukturla yanaşı, siyasi sabitlik və proqnozlaşdırıla bilən mühit də lazımdır. Azərbaycanda bu var. Yeganə qeyri-sabitlik ocağı Azərbaycanın işğal altında olan torpaqları idi ki, bu da artıq keçmişdə qaldı. Azərbaycan öz torpaqlarını azad etdi. Son səkkiz ildə biz əlverişli makroiqtisadi və maliyyə mühiti yaratdıq. Azərbaycanın məzənnəsi stabildir”, – deyə o qeyd edib.

Baş nazirin müavini bildirib ki, Azərbaycanın fiskal vəziyyəti yaxşılaşır:

“Son səkkiz ildə biz xarici valyuta ehtiyatlarımızı demək olar ki, iki dəfə artırmışıq. Hazırda bu ehtiyatlar ölkənin ümumdaxili məhsulunun təxminən 95 %-nə çatır və xarici dövlət borcunu təxminən 15 dəfə üstələyir”.