Dünya bankının Azərbaycanla bağlı proqnozları

Dünya Bankı Azərbaycanın ÜDM-nin 2026-cı ildə 1,8%, 2027-cı ildə isə 1,7% artacağını proqnozlaşdırır.

Bu barədə bankın "Qlobal İqtisadi Perspektivlər" hesabatının yanvar buraxılışında qeyd olunub.

Proqnozlar oktyabr qiymətləndirmələri ilə müqayisədə dəyişməz qalıb. Bankın hesablamalarına görə, ötən ildə Azərbaycan iqtisadiyyatı 1,9% artıb.

Maliyyə institutunun proqnozlarına əsasən, Cənubi Qafqaz ölkələrinin ümumi ÜDM artımı bu ildə 3,3%, gələn ildə isə 3,1% səviyyəsində olacaq.

Hesabatda qeyd olunub ki, Azərbaycanda iqtisadi fəallıq karbohidrogen hasilatının azalması, dünya neft qiymətlərinin düşməsi və büdcə siyasətinin sərtləşməsi ilə məhdudlaşacaq.

Ermənistan və Gürcüstanda yüksək baza səviyyəsindən sonra iqtisadi fəallığın normallaşması ilə özəl istehlakın yavaşlaması gözlənilir, pul köçürmələrinin zəifləməsi və ixrac gəlirlərinin azalması isə cari hesablara təzyiq göstərəcək.

Xatırladaq ki, Azərbaycan İqtisadiyyat Nazirliyi bu ildə ÜDM-in 2,9%, gələn ildə isə 3,3% artımını proqnozlaşdırır.

Hesabatda həmçinin Azərbaycan-Ermənistan arasındakı münasibətlərin yeni reallığına da vurğu edilib. Qeyd olunur ki, 2025-ci ilin avqustunda paraflanmış Ermənistan və Azərbaycan arasında sülh müqaviləsinin sabitliyin möhkəmlənməsinə və regional inteqrasiyanın dərinləşməsinə töhfə verəcəyi gözlənilir.

ABŞ Energetika Nazirliyi isə Azərbaycanın 2027-cı il üzrə neft və digər maye karbohidrogenlərin hasilatı ilə bağlı proqnozunu dəyişməyərək əvvəlki səviyyədə saxlayıb.

Nazirliyin məlumatında bildirilir ki, gələn il Azərbaycanda maye karbohidrogenlərin gündəlik hasilatının 540 min barel səviyyəsində olacağı gözlənilir. Bu göstərici 2026-cı il proqnozu ilə eynidir.