Elnur Əliyev Azərbaycan iqtisadiyyatı ilə bağlı əsas istiqamətləri açıqladı

“2024-cü ilin yanvar-noyabr aylarında ümumi daxili məhsulun həcmi ötən ilin müvafiq dövrü ilə müqayisədə 4,1 % artıb”.

Bunu iqtisadiyyat nazirinin birinci müavini Elnur Əliyev 2024-cü ildə fəaliyyəti ilə fərqlənmiş sahibkarlara “Dayaq” mükafatının təqdim olunması mərasimində deyib.

Onun sözlərinə görə, Azərbaycanda iqtisadi artımın əsas drayveri olan qeyri-neft sektoru 11 ay ərzində 6,4 % artıb:

“ÜDM istehsalının 37,1 faizi sənaye, 10 faizi ticarət, 7,1 faizi nəqliyyat və anbar təsərrüfatı, 6,2 faizi tikinti, 6,1 faizi kənd təsərrüfatı, 2,5 faizi turistlərin yerləşdirilməsi və ictimai iaşə, 1,8 faizi informasiya və rabitə sahələrinin payına düşüb.

2024-cü ilin doqquz ayı ərzində ölkədə 69,6 min yeni iş yeri açılıb. Bu dövrdə yaradılmış iş yerlərinin 92 %-dən çoxu qeyri-dövlət sektorunda açılıb. 2024-cü ildə özəl sektorda əmək müqavilələrinin payı 2018-ci ildəki 37,1 %-dən 52,4 %-ə çatıb”.