Hindistanın ”ONGC Videsh” şirkəti Azərbaycana nə qədər investisiya yatırıb?

Hindistanın “ONGC Videsh” şirkəti Azərbaycan iqtisadiyyatına bu günə qədər təxminən 1,5 milyard ABŞ dolları həcmində investisiya yatırıb.

Bu barədə “Report”a “ONGC Videsh Limited”in Azərbaycan filialının rəhbəri Kalyana Raman Renqara bildirib.

“Şirkət həm Azərbaycanda, həm də üçüncü ölkələrdə SOCAR ilə birgə neft kəşfiyyatı və hasilatı layihələrində iştirak etməkdə son dərəcə maraqlıdır”, – deyə K.R.Renqara vurğulayıb.

Hazırda “ONGC Videsh” Azərbaycanda 2,925 % pay ilə “Azəri-Çıraq-Günəşli” layihəsinin və 3,11 % pay ilə Bakı-Tbilisi-Ceyhan neft kəmərinin iştirakçısıdır.

Şirkətin əsas fəaliyyəti Hindistandan kənarda neft-qaz yataqlarının kəşfiyyatı və işlənməsidir.

Qeyd edək ki, şirkət 15 ölkədə 32 neft-qaz layihəsində aktivlərə malikdir. Ehtiyatlarına və hasilatına görə “ONGC Videsh” Hindistanın ən böyük ikinci enerji şirkətidir və yalnız ana şirkəti ONGC-dən geri qalır.