Kazino fəaliyyətindən gələn gəlirlərin iqtisadi rolu | Ekspertlər aktual məsələdən danışdı

Kazino fəaliyyəti əyləncə sektorunun əsas sahələrindən biri olmaqla yanaşı, həm də ölkələr üçün əhəmiyyətli gəlir mənbəyidir.

Bu baxımdan dünyada ABŞ və Çini, regionda isə Rusiya və Gürcüstanı həmin sahədə nümunə göstərmək olar.

Kazino fəaliyyətinin potensial gəlir mənbəyi olması Azərbaycan üçün də aktualdır. Bu mənada ölkəmizdə kazino fəaliyyətinə başlanılması vergi yığımlarına töhfəsini verə bilər.

Kazino fəaliyyətinə həmçinin qeyri-neft sektoru müstəvisində yanaşdıqda bu həm də sektorun şaxələndirilməklə böyüməsidir. Bu isə vergi yığımlarında qeyri-neft sektorunun payının artması deməkdir.

Millət vəkili Vüqar Bayramov hesab edir ki, kazino fəaliyyəti bu sektordan vergi daxilolmalarına təsir edəcək:

“Azərbaycana gələn turistlərin sayının artması və onların göstərilən xidmətlərdən geniş istifadə etmələri dövlət büdcəsinə vergi daxilolmalarının artmasına müsbət təsir göstərir. Bu kontekstdə gözlənilən odur ki, yeni fəaliyyət dövlət büdcəsinə xüsusən də qeyri-neft sektorundan daxilolmaların artmasına müsbət təsir göstərəcək”.

Hazırda Vergi Məcəlləsinə əsasən, mənfəət vergisinin dərəcəsi 20 faiz təşkil edir. Fiziki şəxslərin gəlir vergisi isə 14 faizdən başlayır. Lakin kazino fəaliyyətinin potensialı bu sahənin daha böyük faiz dərəcəsində vergiyə cəlb edilməsinə imkan verir. Bu da vergi yığımı istiqamətində daha bir imkandır.