Kristofoli SOCAR-la əməkdaşlığı mühüm istiqamət kimi qiymətləndirib - Baku TV

"BP şirkətinin qlobal strategiyası neft və qaz hasilatının artırılmasına yönəlib və bu baxımdan Azərbaycan şirkətin strateji planlarına tam uyğun gələn mühüm istiqamət kimi nəzərdən keçirilir".

Bunu BP-nin Azərbaycan, Gürcüstan və Türkiyə üzrə regional prezidenti Covanni Kristofoli bildirib.

"Şirkətimizin qlobal miqyasda strategiyası neft və qaz hasilatının artırılmasından ibarətdir. Biz neft-qaz sahəsində böyümək istəyirik və Azərbaycan bu baxımdan həmin strategiyanın həyata keçirilməsini çox yaxşı dəstəkləyə bilər", – deyə Kristofoli bildirib.

O əlavə edib ki, Xəzər dənizi bir region kimi onların strategiyasına tam uyğundur.

"Ona görə də biz çox istəyərdik ki, bundan sonra da ölkə rəhbərliyi və Azərbaycan Dövlət Neft Şirkəti ilə işləyək, yeni imkanları birlikdə müzakirə edib onlara qoşulaq", – deyə regional prezident qeyd edib.

O əlavə edib ki, hazırda şirkət qaz hasilatı üçün yeni sahələrin müəyyənləşdirilməsi məqsədilə Xəzər dənizində fəal şəkildə seysmik tədqiqatlar aparır:

"Bu seysmik tədqiqatlar bizə Xəzərin hansı hissələrində yeni potensial qaz ehtiyatlarının olduğunu tapmağa imkan verəcək. Geoloji kəşfiyyat baxımından bizim artıq mövcud layihələrimiz var. Bunlardan ən əsası "Şəfəq-Asiman"dır. Bu layihədə aparmağı planlaşdırdığımız kəşfiyyat işlərinə böyük ümidlə baxırıq".

Kristofoli həmçinin bildirib ki, "Şahdəniz" layihəsi üzrə bütün əməliyyatlar tam sürətlə davam edir.