Maaş artımı ilə bağlı şad xəbər | Bütün detallar açıqlandı

Prezident İlham Əliyevin imzaladığı sərəncamla 2025-ci ildən minimum əməkhaqqı 400 manata yüksəldilib.

Hazırda ölkədə maaşların 345 manatdan başladığını nəzərə alanda bu, həmin məbləğdə olan əməkhaqlarının 16 faiz artması deməkdir.

İqtisadçı deputat Vüqar Bayramovun sözlərinə görə, minimum əməkhaqqındakı artım sadəcə aşağı maaş alanların deyil, eləcə də vahid tarif cədvəlinin bütün pillələri üzrə əməkhaqlarında artımları təmin edəcək.

O bildirib ki, dövlət büdcəsindən maliyyələşdirilən sahələrdə çalışan işçilərin aylıq tarif maaşları da bu sərəncama uyğunlaşdırılacaq və artırılacaq:

“Sosial, elm, səhiyyə, mədəniyyət, gənclər və idman, kənd təsərrüfatı, ekologiya və ətraf mühitin mühafizəsi, mənzil-kommunal, nəqliyyat və rabitə, meliorasiya, su təsərrüfatı və balıqartırma sahələrində çalışan dövlət qulluqçusu statusu olmayan işçilərin də əməkhaqları artacaq”.

Deputat müəllim və həkimlərin maaşlarında da artım olacağını vurğulayıb.

Qeyd edək ki, 19 pillədən ibarət vahid tarif cədvəli üzrə əməkhaqları hazırda 345 manatdan 1125 manatadək dəyişir. 4-cü dərəcəyə qədər olan əməkhaqlarının məbləği 400 manatdan aşağıdır. Minimum əməkhaqqının artması, həmçinin fərdi sahibkarların aylıq sosial ödənişlərinə də təsir edəcək. Belə ki, onların sosial müdafiə, işsizlikdən sığorta və icbari tibbi sığorta üzrə ödənişləri minimum əməkhaqqı əsasında müəyyən olunur.