“MUĞAN BANK”ın yarım milyarddan çox borcu üzə çıxdı: bankda nə baş verib?

Mərkəzi Bankın İdarə Heyətinin qərarı ilə “Muğan Bank”ın lisenziyası oktyabrın 19-dan ləğv edilib.

Vurğulanıb ki, 3-cü rübün sonuna bank üzrə sığortalanmış əmanətlər 216,7 milyon manat təşkil edib.

"Muğan Bank"ın sözügedən dövr üzrə maliyyə hesabatına görə, depozit portfelinin həcmi 322 milyon 478 min manat təşkil edib. Bu isə o deməkdir ki, bankdakı 105 milyon 778 min manat məbləğində depozit sığortalanmayıb və onun aqibətinin necə olacağı məlum deyil.

Söhbət ondan gedir ki, bankın Mərkəzi Bank və digər dövlət fondlarına da 168 milyon 434 min manat borcu var. Sığortalanan əmanətlərdən sonra bu öhdəliklər də ödənilməlidir. Bununla belə, "Muğan Bank"ın ümumi 500 milyon manatdan çox öhdəliyi qarşılığında likvid pul vəsaitləri cəmi 29,9 milyon manatdır.

Belə ki, 2023-cü ilin əvvəlində bankın pul vəsaitləri və pul vəsaitlərinin ekvivalentləri 169 milyon 608 min manat təşkil etdiyi halda oktyabrın 1-nə bu rəqəm 139 milyon 687 min manat azalıb. Bu dövrdə həmçinin bankın aktivləri 19 faizə yaxın azalaraq 647 milyon 971 min manata enib.