Proses asanlaşdı: sənədsiz obyektlərə çıxarışlar bu qaydalarla verilir

Prezident İlham Əliyevin müvafiq fərmanı ilə istismarına icazə verilən obyektlərə çıxarış verilməsinə başlanılıb.

Bu vaxta qədər sığorta şirkətləri qeyri-yaşayış obyektlərini sığortalamaqdan imtina edirdi. Bunun səbəbi isə həm obyektin sənədinin olmaması, həm də sənəd olduğu halda obyektin dəyərinin çox göstərilməsi idi.

Ekspertlərin fikrincə, çıxarışların verilməsi bu problemi də həll etmiş olacaq.

“Hadisə 1 milyonluq əmlaka münasibətdə baş verir. Sığorta haqqı da əmlakın real dəyərinə uyğun müəyyənləşdirilməlidir. Sənəddə real dəyər əks olunmayanda sığorta şirkətləri baş verəcək risk qarşısında ciddi problemlərlə üz-üzə qalır. Bu baxımdan sənədlərin qaydasında olması məsələləri əhəmiyyəti dərəcədə irəli apacaq”, – iqtisadçı Rəşad Həsənov bildirib.

Qeyd edək ki, mülkiyyət hüququnu dövlət qeydiyyatına aldırmaq istəyən şəxslər Bakı şəhəri üzrə Dövlət Şəhərsalma və Arxitektura Komitəsindən, digər rayon və şəhərlər üzrə yerli icra hakimiyyətindən istismara təhvil aktı əldə etdikdən sonra Daşınmaz Əmlakın Dövlət Kadastrı və Reyestri Publik Hüquqi şəxsin ərazi idarələrinə və ASAN ofislərinə ərizə ilə müraciət edə bilərlər.