“Qara qızıl” bahalaşa bilər, yoxsa...? | Ekspert məsələyə aydınlıq gətirdi

İsraillə İran arasındakı hərbi əməliyyatların neft bazarına ciddi təsir edəcəyi proqnozlaşdırılırdı.

Reallıq isə onu göstərdi ki, əməliyyatların ilk günündə “Brent” markalı neftin qiyməti 69 dollardan 74 dollar səviyyəsinə qədər yüksəlsə də, sonrakı birja günündə artım davam etməyib. Eyni ssenari Qərbi Texas nefti üzrə də təkrarlanıb. İlk gündə 73 dollara yaxın yüksələn qiymət daha sonrakı gündə enib.

Ekspertlər hesab edirlər ki, hazırda neftin qiymətinə təsir edəcək əsas amil qlobal neft tədarükünün 20 faizinin keçdiyi Hörmüz boğazıdır.

Bildirilir ki, boğaz hətta qısa müddətə bağlanarsa, qiymətlər kəskin arta bilər. Hörmüz boğazının bağlanması ilə bağlı narahatlıq isə təsadüfi deyil.

Belə ki, əməliyyatların ilk günlərində yayılan məlumatlara görə, rəsmi Tehran İsrailin ardıcıl hərbi hücumlarına cavab olaraq boğazın bağlanmasını nəzərdən keçirir. Lakin ötən dövrdə bu istiqamətdə heç bir addım atılmayıb.

“S&P Global Ratings” agentliyi isə bəyan edib ki, neftin qiymətində artımın region üçün müsbət iqtisadi nəticə verməsi üçün əsas şərtlərdən biri də Hörmüz boğazının bağlı yox, açıq olmasıdır. Əks təqdirdə qiymət artımı davamlı olmayacaq, hətta bəzi ixracatçı ölkələrin gəlirlərində itkilər də mümkündür.

Agentlik hazırda neft bazarında təklifin tələbi üstələməsini nəzərə alaraq orta və uzunmüddətli dövrdə qiymətlərin sabitləşəcəyini proqnozlaşdırır.