Sahibkarlar üçün daha əlverişli və bərabər bazar şəraiti formalaşacaq - Baku TV

Xəbər verildiyi kimi, Prezident İlham Əliyevin müvafiq Sərəncamı ilə “Rəqabətin inkişafına və inhisarçılıq fəaliyyətinin qarşısının alınmasına dair 2027–2029-cu illər üzrə Milli Fəaliyyət Planı” təsdiq edilib.

Sənəd iqtisadiyyatda sağlam rəqabət prinsiplərinin təşviqinə, bazar münasibətlərinin səmərəliliyinin yüksəldilməsinə və bu istiqamətdə digər tədbirlərin təkmilləşdirilməsinə yönəlib. Planda ayrı-ayrı məhsul bazarlarında rəqabət mühitinin öyrənilməsi, tənzimləmə alətlərinin təkmilləşdirilməsi, aidiyyəti dövlət orqanları arasında səmərəli əlaqələndirmənin təmin olunması əsas istiqamətlər kimi müəyyən edilib.

Milli Fəaliyyət Planının icrası çərçivəsində sahibkarlığın inkişafı, bütün bazar iştirakçıları və istehlakçılar üçün bərabər və əlverişli şəraitin yaradılması, özəl sektorun iqtisadi proseslərdə rolunun artırılması və digər tədbirlərin həyata keçirilməsi nəzərdə tutulub.

İqtisadçı Xalid Kərimli bildirir ki, Milli Fəaliyyət Planının qəbulu rəqabət siyasətinin daha sistemli şəkildə qurulmasına imkan verəcək.

“Bu sənədin ən mühüm yeniliyi rəqabət xəritəsinin hazırlanmasıdır. Çünki biz hələ də bilmirik ki, hansı bazarlarda hansı iştirakçıların payları çoxdur və bazarda üstün mövqeyə malikdirlər. Rəqabət Məcəlləsinin işə düşməsi üçün rəqabəti pozma ehtimalı olan qüvvələrin müəyyən edilməsi ilkin və vacib addımdır.

Bu baxımdan rəqabət xəritəsinin hazırlanması işləri ciddi şəkildə asanlaşdıracaq, qərarların qəbuluna və Rəqabət Məcəlləsinin tətbiqinə imkan yaradacaq, rəqabət orqanının fəaliyyətinin effektivliyini artıracaq”, – deyə iqtisadçı qeyd edib.