SOCAR-da Şamaxı-Qobustan ərazisi üzrə tədqiqat proqramının nəticələrinin təqdimatı oldu

SOCAR-da Şamaxı-Qobustan ərazisini əhatə edən innovativ hava qravimetriya tədqiqat proqramının nəticələrinin təqdimatı olub.

Tədbirdə çıxış edən SOCAR-ın Təbii ehtiyatların kəşfiyyatı seqmenti üzrə vitse-prezidenti Arzu Cavadova kəşfiyyat komandasının strateji baxışı və əsas məqsədləri barədə məlumat verib. Həmçinin “Caspian Geophysical” MMC-nin baş icraçı direktoru Kamran Zahid yüksəkkeyfiyyətli məlumatların əsaslı kəşfiyyat qərarlarının qəbulundakı rolunu vurğulayıb.

Böyük geofizik Ayaz Qasımov qravimetriya tədqiqatlarının kəşfiyyat alətlərinə inteqrasiyasının strateji əhəmiyyətinə dair təqdimat edib. Eyni zamanda “Metatek” şirkətinin baş direktoru Conatan Vatson mürəkkəb relyef şəraitində qravimetrik məlumatların toplanması və işlənməsi zamanı qarşıya çıxan texniki çətinliklər və analitik yanaşma barədə danışıb.

Bildirib ki, qravimetriya tədqiqatı ilə yanaşı, yüksək dəqiqlikli “LiDAR” və maqnit məlumatları da əldə olunub. Bu məlumatların mövcud seysmik məlumatlarla inteqrasiyası Şamaxı-Qobustan regionunda quruda neft-qaz kəşfiyyatı üzrə qərarların daha dəqiq və səmərəli şəkildə qəbuluna imkan verəcək.